ჩვენ შესახებ

ჩვენი პროექტის „კინო სკოლაში“ მთავარი მიზანია, კინოხელოვნების პოპულარიზაციის გზით, მოზარდებს ანალიტიკური აზროვნება და შემოქმედებითი უნარები განვუვითაროთ. სწორედ ამიტომ, ჩვენ საქართველოს სკოლებში მივდივართ და მოსწავლეებს, სპეციალურად მათთვის შერჩეულ კინო პროგრამას ვთავაზობთ.

პროექტში ჩართულ სკოლებში ყოველკვირეულად იმართება ქართული და უცხოური ფილმების ჩვენება; სპეციალურად შერჩეული სასწავლო მასალის გამოყენებითა და „კინომისიონერების“ (კინო სპეციალისტების) მონაწილეობით, ჩვენებებს შემეცნებითი დისკუსიები და საინტერესო საუბრები მოჰყვება. გარდა ამისა, სკოლის მოსწავლეები ჩართული არიან სხვადასხვა შემოქმედებით აქტივობებში: იღებენ ფილმებს, ხატავენ აფიშებს, წერენ რეცენზიებს და მონაწილეობენ პროგრამის ფარგლებში ჩატარებულ სახალისო კონკურსებში. ამას გარდა, ხშირად იმართება ხოლმე შეხვედრა რომელიმე ცნობილ ქართველ კინემატოგრაფისტთან ანდა მსახიობთან.  ჩვენი პროექტის სტუმრები სხვადასხვა დროს ყოფილან: ელდარ შენგელაია, მიშა კობახიძე, ზაზა ურუშაძე, ლევან კოღუაშვილი, ზაზა კოლელიშვილი, კახი კავსაძე, გივი ბერიკაშვილი, მერაბ ნინიძე და სხვა.